أگادير تسقط السمارة من عرش الأرقام القياسية في الحرارة.

أحنا أثرنا ماكنا عالمين عنا كنا محطمين الرقم القياسي في الحرارة على الصعيد الوطني بمعدل 49،90 يعني 50 قل شوي..!!

أيوة ألف مبروك لمسؤولي السمارة هذا الإنجاز التاريخي واخا گاع تخطاتو أگادير يامس بمعدل 50،40 وعدنا الثانيين..!!

المهم عند المسؤولين عن السمارة منين ما نذكرت دشرتهم فأحسن تنمية وأفضل بنية تحتية وأرقى تأهيل حضري وأروع ناطحات سحاب وأحسن دخل فردي وأفضل وجهة سياحية وأقوى منطقة اقتصادية على الأقل تنذكر الأولى حرارة وسخونة..!!

للأسف ما علمنا بتربعنا على قمة الأرقام القياسية ذاك العام أمال نعدلو لهذا الحدث ما يستحق من الاحتفاء وشوف گاع حتى مسؤولينا كانهم كانوا عالمين.!!

المهم نحن أهل السمارة لن نقبل بهذا البلاغ ولن تنطلي علينا كذبة رقم 49 بيه اصلا هذا الرقم نحنا موالفينو فشهر أكتوبر ويناير أمال يامس وأول نامس المعدل إن شاء الله ما ينزل عن 54 مطنطنة وعارفة شي لراسها..!!

وأهل السمارة اصلا نهار اوسجل فيه رقم 49 مسمينو ” نهار أصفر” يعني عادي ماهو شي تشتد اخبارو وحتى نهار فيه 50 يسمى نهار حامي شوي..!!

گولو بغيتو اللقب لأگادير..!! واخا ناسها عندهم البحر والشاطئ وتاغازوت والتنمية الزينة والاقتصاد لمتين.. وووو!!

گولو حاسدين السمارة مسيكينة عنها تنذكر فشي حتى فالحمان وشين السعد وشين الرادة..!!

لا حول ولا قوة إلا بالله.

أيوة أللا لي مشكك فخمسينيات السمارة رانا منادينو يفوت معانا نهارات ويشوف الأرقام حگ حگ..!!

وماهو لي كنا نگولوا.. أراهو بعد اليوم أشبه من يامس الحمد لله.